बेइजिङ, असार १ गते। विश्व अर्थतन्त्रमा देखिएको सुस्तताले चीनमा हुँदै आएको प्रत्यक्ष वैदेशिक लगानीसमेत प्रभावित भएको छ।
चीनमा लगानी गर्नेको कुरा विशेष आकर्षणको केन्द्रमा रहँदै आएको भए पनि सन् २०१२ को पहिलो पाँच महिनामा प्रत्यक्ष वैदेशिक लगानी एक दशमलव नौ प्रतिशतले घटेको बताइएको छ।
विश्वको दोस्रो आर्थिक महाशक्ति चीनले सन् २०१२ को जनवरीदेखि मे महिनासम्ममा ४७ अर्ब १० करोड अमेरिकी डलर बराबर प्रत्यक्ष वैदेशिक लगानी प्राप्त गरेको पाइएको छ।
चीनमा लगानी गर्ने कुरामा युरोपको हिस्सा प्रमुख रहँदै आएको भए पनि हाल युरोपेली आर्थिक सङ्कटले सो क्षेत्रबाट प्राप्त हुने लगानी प्रभावित भएको पाइएको छ।
सन् २०११ मा चीनले कुल एक सय १६ अर्ब अमेरिकी डलर प्रत्यक्ष वैदेशिक लगानी भित्राएको र त्यस्तो लगानी सन् २०१५ सम्म वाषिर्क एक सय २० अर्व अमेरिकी डलर पुर्याउने लक्ष्य लिएको भए पनि हालको पाँच महिनामा हासिल भएको प्रत्यक्ष वैदेशिक लगानीले निराशा बढाएको छ।
चीनको अर्थतन्त्रमा प्रत्यक्ष वैदेशिक लगानी र निर्यातले प्रमुखता पाउँदै आएकोमा हाल प्रत्यक्ष वैदेशिक लगानी र निर्यात दुवै खस्किएकोले सो मुलुकको समग्र अर्थतन्त्र पनि प्रभावित बनेको बताइएको छ।
चीनले विगतमा दोहोरो अङ्कको आर्थिक वृद्धि हासिल गर्दै आएको भए पनि हाल त्यस्तो वृद्धिदर आठ प्रतिशतको नजिक झरेको कुरा तथ्याङ्कहरूले देखाएको छ।
