काठमाडौँ, जेठ ३२ गते। अन्तरक्षेत्र राष्ट्रव्यापी राष्ट्रपति रनिङ शिल्ड प्रतियोगिताको एथलेटिक्सतर्फ दुई सय मिटर दौडको छात्रमा पूर्वाञ्चलका अजय श्रेष्ठ र छात्रामा पश्चिमाञ्चलकी कृष्णा चौधरीले बिहीबार स्वर्ण जितेका छन्।
निर्धारित दूरी पूरा गर्न अजयले २३.७ सेकेण्ड तथा कृष्णाले २७.९ सेकेण्ड समय खर्चे। कृष्णाको यो दोस्रो व्यक्तिगत स्वर्ण हो। अघिल्लो दिन कृष्णाले सय मिटर दौडमा पनि बाजी मारेकी थिइन्।
युवा तथा खेलकुद मन्त्रालयको तत्वावधानमा राष्ट्रिय खेलकुद परिषद् -राखेप)द्वारा आयोजित प्रतियोगिताको पाँच हजार मिटर दौडको छात्रमा पूर्वाञ्चलका उमेश कन्दङवा -१७ मिनेट ०५.३ सेकेण्ड) तथा छात्रामा मध्यपश्चिमाञ्चलकी सुनमाया बुढाले -१९ मिनेट ५६.७ सेकेण्ड) शीर्ष स्थानमा रहँदै व्यक्तिगत स्वर्ण सङ्ख्या दोब्बर बनाए। यी दुवैले १५०० मिटर दौड पनि जितेका थिए। छात्र चार सय मिटर दौड ५३.४ सेकेण्डमा पूरा गर्दै पश्चिमाञ्चलका विनोद गुरुङ च्याम्पियन बने।
छात्र ज्याभ्लिन थ्रोमा मध्यपश्चिमाञ्चलका अनुराजकुमार थारू र छात्रा वर्गमा पश्चिमाञ्चलकी अञ्जुकुमारी डगौराले स्वर्ण जिते। टि्रपल जम्पमा सुदूरपश्चिमाञ्चलका सुरज सिंह र प्रभा चौधरीले क्रमशः छात्र र छात्रा वर्गमा स्वर्ण चुमे। प्रभाले हाइजम्पमा पनि स्वर्ण जितेका थिए।
