काठमाडौँ, जेठ २७ गते। राष्ट्रिय प्रजातन्त्र पार्टी राप्रपा नेपालका अध्यक्ष कमल थापाले चार दलले गरेका निर्णय अब राष्ट्रिय सहमति हुन नसक्ने बताउनुभएको छ।
राप्रपा नेपालले शनिबार आयोजना गरेको बृहत् आमसभामा बोल्दै उहाँले भन्नुभयो, "चार दलले सिन्डिकेट गरेर मुलुकमाथि ब्रहृमलुट गर्ने दिन समाप्त भएको छ।"
उहाँले चार वर्षअघि सम्पन्न संविधानसभाको निर्वाचनमा पाएको भोटका आधारमा चार दलले अझै पनि मुलुकमा वर्चस्व राख्न खोजिरहेको आरोप लगाउँदै संविधानसभा अन्त्य भइसकेकाले अब कुनै पनि दल ठूलो नभएको र अब हुने जुनसुकै सहमति र सम्झौतामा आफूहरूको पनि सहभागिता हुनुपर्ने बताउनुभयो।
उहाँले चार वर्षअघि पाएको भोटका आधारमा बनेका प्रमुख चार दलको सहमति र सल्लाहमा कुनै पनि निर्णय नलिन राष्ट्रपतिसमक्ष आग्रह गर्दै त्यस्तो कुनै निर्णय लिइएमा मुलुक दुर्गतितिर जाने दाबी गर्नुभयो।
अध्यक्ष थापाले संविधानसभाको हत्यामा चार दल बराबर जिम्मेवार छन् भन्दै उनीहरूको अकर्मण्यता, गलत नीति र सत्तालिप्साका कारण संविधान बन्न नसकेर संविधानसभाले मृत्युवरण गर्न पुगेको बताउनुभयो।
"संविधानसभालाई मृत्युमा पुर्याई चार दलले जघन्य अपराध गरेका छन्", उहाँले भन्नुभयो, "उनीहरूलाई जनताले माफ गर्नेछैनन्।"
