काठमाडौँ, जेठ २ गते। प्रधानमन्त्री एवं त्रिभुवन विश्वविद्यालयका कुलपति डा. बाबुराम भट्टराईले राष्ट्रिय तथा अन्तर्राष्ट्रिय परिवेशअनुसार विश्वविद्यालय शिक्षालाई परिमार्जन र वैज्ञानिकीकरण गर्नु अहिलेको प्रमुख आवश्यकता भएको बताउनुभएको छ। उहाँले पठनपाठनमा अनियमितता, समयमा परीक्षा र परीक्षाफल प्रकाशन नहुनेजस्ता व्यवस्थापकीय त्रुटिमा सुधार गरिनुपर्ने बताउनुभयो।
त्रिभुवन विश्वविद्यालयको उच्च निकाय 'त्रिवि सभा'को बैठकलाई मङ्गलबार कुलपतिको हैसियतले सम्बोधन गर्दै प्रधानमन्त्री भट्टराईले सार्वजनिक विश्वविद्यालय भएकाले उच्च शिक्षाको पहुँच आमनागरिकसम्म पुर्याउने जिम्मेवारी त्रिविले बहन गर्नुपर्ने उल्लेख गर्नुभयो।
प्रधानमन्त्री भट्टराईले राजनीतिक भागबण्डाको संस्कृतिले कतिपय नियुक्ति निर्धारित समयमा हुन नसकेको उल्लेख गर्दै भागबण्डाको संस्कार अन्त्य गर्न आग्रह गर्नुभयो।
विश्वविद्यालयको विकासका लागि विद्यार्थी, शिक्षक र कर्मचारीहरू समन्वयका आधारमा अघि बढ्नुपर्नेमा उहाँले जोड दिनुभयो। कुनै एक पक्षलाई मात्र दोष दिएर विश्वविद्यालयले गति लिन नसक्ने उहाँको भनाइ छ।
विद्यार्थीहरू भर्ना हुने तर विश्वविद्यालयमा नियमित रूपमा कक्षा लिन नआउने अवस्थामा सुधार ल्याउन खुला र दूर शिक्षा सिकाइका माध्यमबाट पठनपाठन अघि बढाउनुपर्ने प्रधानमन्त्री भट्टराईले बताउनुभयो। उहाँले त्रिवि नेपालमा मात्र नभई विश्वमै परिचित नेपालको अग्रणी विश्वविद्यालय भएको उल्लेख गर्नुभयो।
कार्यक्रममा त्रिविका उपकुलपति प्रा. डा. हीराबहादुर महर्जनले विश्वविद्यालय नयाँ नीति तथा कार्यक्रमका साथ अघि बढ्न लागेको जानकारी दिनुभयो। विश्वविद्यालयको शैक्षिकलगायत विभिन्न क्षेत्रमा सहयोग पुर्याउन उहाँले सभासद्हरूलाई आग्रह गर्नुभयो।
कार्यक्रममा त्रिविका शिक्षाध्यक्ष प्रा. गुणनिधि न्यौपानेले विश्वविद्यालयको वाषिर्क प्रतिवेदन प्रस्तुत गर्नुभएको थियो। सभा बैठकले शिक्षाध्यक्ष न्यौपानेले प्रस्तुत गरेको वाषिर्क नीति तथा कार्यक्रमलाई सुझावसहित पारित गरेको थियो।
सभाले आर्थिक वर्ष सकिन दुई महिनामात्र बाँकी हुँदा चालू आवको बजेट पनि पारित गरेको छ। यससम्बन्धी प्रस्ताव पेस गर्दै त्रिविका रजिष्ट्रार डा. चन्द्रमणि पौडेलले त्रिविका कर्मचारीको निवृत्तिभरण र उपदानलाई प्रभावकारी बनाउन नसकिएको, आर्थिक अवस्था कमजोर रहेको र निजामती कर्मचारीसरह विश्वविद्यालयका प्राध्यापक कर्मचारीले पोशाक भत्ता पाउन नसकेको उल्लेख गर्नुभयो।
सभाको बैठकमा बोल्दै नेपाल प्राध्यापक सङ्घका महासचिव रामेश्वर उपाध्यायले पदाधिकारीहरूले विश्वविद्यालयलाई पारदर्शी हिसाबले सञ्चालन गर्न नसकेको आरोप लगाउनुभयो। सभाका सभासद् प्रा. डा. उपेन्द्र कोइरालाले त्रिविका उपकुलपति महर्जनले विगतमा प्रतिबद्धता जनाएका कुनै पनि नीति तथा कार्यक्रम सभामा आउन नसकेको भन्दै आलोचना गर्नुभयो।
सभाका सभासद् प्रा. डा. व्रतराज आचार्यले वाषिर्क नीति तथा कार्यक्रमले विश्वविद्यालयको शैक्षिक एवं अन्य समस्यालाई सम्बोधन गर्न नसकेको बताउनुभयो।
२०१३ सालमा स्थापित त्रिविमा हाल ६० वटा आङ्गिक क्याम्पस र ८३२ वटा सम्बन्धनप्राप्त क्याम्पस सञ्चालनमा छन्। विश्वविद्यालयले चिकित्साशास्त्र, इन्जिनियरिङ, कृषि तथा पशु विज्ञान, मानविकी तथा सामाजिकशास्त्र, कानुन, व्यवस्थापन, वन, शिक्षाशास्त्र, विज्ञान तथा प्रविधि विषयमा उच्च शिक्षा कार्यक्रम सञ्चालन गर्दै आएको छ।
