काठमाडौँ, फागुन २ गते। स्वैच्छिक अवकाश रोजेका एकीकृत नेकपा -माओवादी)का पूर्वलडाकूहरूको बिदाइकोे युरोपियन युनियनले स्वागत गरेको छ। नर्वे र स्विजरल्यान्डस्थित युरोपियन युनियन कार्यालयले संयुक्तरूपमा मङ्गलबार विज्ञप्ति जारी गरेर उक्त कदमको स्वागत गरेको नेपालस्थित युरोपियन युनियनको कार्यालयले जनाएको छ।

पहिलो चरणको पूर्वमाओवादी लडाकूलाई शिविरबाट गरिएको बिदाइको स्वागत गर्दै 'पूर्वलडाकूहरू बिदाइपश्चात् सामाजिक रूपान्तरतर्फ उन्मुख हुनुका साथै आफ्नो पहिचान स्थापना गर्ने दिशातर्फ अग्रसर हुने हामी विश्वत गछौँ। यो क्षण शान्तिप्रक्रियाका लागि एक ऐतिहासिक क्षण हो' मङ्गलबार नेपालस्थित युरोपिय युनियन कार्यालयले जारी गरेको विज्ञप्तिमा उल्लेख गरेको छ। साथै उक्त विज्ञप्तिमा शान्तिप्रक्रिया तथा संविधान लेखन कार्य निर्धारित समयमा टुङ्ग्याउनेतर्फ राजनीतिक दलहरू समझदारी तथा सहकार्यका साथ लाग्ने विश्वास व्यक्त गरिएको छ।